Valutakjøp til SPU

Finansdepartementet har bedt Noregs Bank om å ta seg av dei månadlege overføringane til SPU. Overføringane er i utanlandsk valuta sidan alle midlane i SPU skal investerast i utlandet. Mesteparten av inntektene til SDØE er i utanlandsk valuta. Noregs Bank kjøper denne valutaen. Normalt er det behov for meir valuta for å dekkje avsetjinga til SPU. Denne valutaen kjøper Noregs Bank i marknaden. Noko forenkla kan ein seie at Noregs Bank vekslar om til valuta statens kroneinntekter frå petroleumssektoren minus det oljekorrigerte underskotet på statsbudsjettet, før midlane blir overførte til investeringsporteføljen i SPU.

Noregs Banks valutakjøp til SPU skjer dagleg dei månadene det er behov for å kjøpe valuta. Kjøpa blir fastsette for éin månad om gongen og blir kunngjorde i ei pressemelding den siste arbeidsdagen i månaden før.

Inntektene frå SDØE og valutaen som Noregs Bank kjøper i marknaden, inngår i ein valutaportefølje i Noregs Bank som blir kalla petrobuffer. Dei månadlege overføringane til SPU blir tekne frå denne porteføljen. Overslaga for statens inntekter frå petroleumssektoren og det oljekorrigerte underskotet på statsbudsjettet kan endre seg mykje gjennom året. Endringane vil påverke avsetjinga til SPU og dermed valutakjøpa til Noregs Bank. Basert på anslag om utviklinga i desse storleikane kan Noregs Bank kjøpe meir valuta enn det dei opphavlege anslaga på avsetjinga skulle tilseie. Noregs Bank kan òg kjøpe mindre valuta enn anslaga for avsetjinga tilseier, dersom den økonomiske utviklinga indikerer at den faktiske avsetjinga kjem til å falle, eller dersom petrobufferen er stor nok til å dekkje den framtidige avsetjinga. Av omsyn til kronekursen prøver Noregs Bank å jamne ut valutakjøpa gjennom året. Generelt prøver Noregs Bank å byggje ned storleiken på petrobufferen mot slutten av året.

Kvartalsvis inn- og utflyt av petrobufferporteføljen, i millionar kroner

* Marknadsverdien ved kvartalsslutt avvik noko frå netto kontantstraum fordi marknadsverdiane endrar seg gjennom månaden.

Behaldninga og innflyten i petrobufferen blir publiserte i kvartalsrapportene for forvaltinga av valutareservane.

Om endringa i overføringsmønsteret oktober 2012

Før 2012 var det ikkje overføring til SPU i desember. For året sett under eitt planla då Noregs Bank valutakjøpa basert på elleve månader med overføringar og tolv månader med valutainnflyt frå SDØE. Ettersom valutainntektene til SDØE i desember ikkje kunne overførast til SPU den same månaden, blei dei «lagra» i petrobufferen for avsetjing året etter. Finansdepartementet rekna likevel med desemberinntektene til SDØE i anslaget for avsetjinga for året. Dermed måtte Noregs Bank dekkje opp for desemberinntektene til SDØE ved valutakjøp før utgangen av november og den siste avsetjinga i året.

I oktober 2012 blei retningslinjene for SPU-forvaltinga endra slik at det skal overførast valuta til SPU i desember òg. Endringa medfører at valutainntektene SDØE har i desember, må reknast med når Noregs Bank planlegg valutakjøpa for året. Med avsetjing til SPU i desember vil Noregs Bank normalt kjøpe valuta for dette formålet også i desember. Det inneber at Noregs Bank kjøper noko mindre valuta til SPU dei andre månadene i året. Vi viser elles til pressemelding frå Noregs Bank 31. oktober 2012, «Valutakjøp til Norges Bank i november 2012».

For meir utdypande informasjon, sjå Petroleumsfondsmekanismen og Norges Banks valutakjøp til SPU (Aktuell kommentar 14/2012)

Daglege kjøp. Tala i millionar kroner:

 * Frå 23. oktober 2008: 620 millionar kroner

** Frå 21. mai 2003: 0 millionar kroner