FAQ - Valutakursar og valutareservar

Kva er ein valutakurs?
Valutakursen er prisen på eit lands valuta målt mot andre lands valuta, til dømes norske kroner per euro. Valutakursen blir bestemt i den internasjonale valutamarknaden ved at valutakursen skaper likskap mellom den samla etterspurnaden etter og tilbodet av valutaen.
Kva er meint med fast og flytande valutakurs?
Ved fast valutakurs grip sentralbanken aktivt inn i valutamarknaden med kjøp og sal for å halde den offisielle valutakursen. Ved flytande valutakurs, slik Noreg har, vil kursen spegle tilbods- og etterspurnadsforholda i den internasjonale valutamarknaden. Kronekursen gir uttrykk for den internasjonale verdien av norske kroner.
Kvar finn eg tal for valutakursane?
Tal for dagens kursar

For å finne kursar på fleire valutaer enn det Noregs Bank noterer, kan ein til dømes sjå på desse valutakalkulatorane på Internett:
Oanda.com
XE Universal Currency Converter
Kva slags valutakursar er det Noregs Bank noterer?
Valutakursane til Noregs Bank er midtkursar, det vil seie midtpunktet mellom kjøps- og salskursen i interbankmarknaden på eit gitt tidspunkt. Reint teknisk vil Noregs Bank tett opp til tidspunktet for kursnoteringar hente inn ein aktuell kurs, til dømes norske kroner for ein euro, i interbankmarknaden frå bankar og elektroniske handlesystem og setje ein mest mogleg rett marknadskurs på dette tidspunktet. Denne kursen blir rapportert elektronisk til den europeiske sentralbanken (ESB). På same måte vil ei rekkje sentralbankar i Europa rapportere kursar på andre valutaer mot euro. For valutaer som ikkje er omfatta av denne rapporteringa, vil Noregs Bank hente inn marknadskursar frå elektroniske informasjonssystem og/eller bankar. Fordi ein valutakurs alltid uttrykkjer forholdet mellom to valutaer, nyttar ein rapporteringa frå sentralbankane i andre land for å berekne valutakursar i norsk rekning.
Når blir valutakursane publiserte?
Kursane blir vanlegvis sette klokka 14.15. Unntaka er onsdag før skjærtorsdag og nyttårsaftan, då blir kursane sette klokka 09.30. Frå og med 2004 blir ikkje valutakursane publiserte på julaftan lenger. Noregs Bank publiserer kursane på elektroniske informasjonssystem så snart dei er ferdig berekna.
Kan eg handle på valutakursane til Norges Bank?
Valutakursane er berre meinte som ein indikasjon og er ikkje bindande for Noregs Bank eller bankane. Valutakursane til Noregs Bank blir ofte brukte som referanse og til historiske samanlikningar. Norske bankar kan ha forskjellige rutinar for når dei oppdaterer valutakursar som blir nytta i transaksjonar overfor publikum. Fordi valutakursane stadig vil kunne bevege seg, kan kursane til bankane avvike frå kursane til Noregs Bank. I tillegg er det lagt til kundemarginar for kjøp og sal på kursane til bankane, mens kursane til Noregs Bank er reine midtkursar.
Kva er valutareservane?
Valutareservane er Noregs Bank sine behaldningar av finansielle aktiva i utanlandsk valuta som skal kunne nyttast i gjennomføringa av pengepolitikken eller ut frå omsynet til finansiell stabilitet. Noregs Bank forvaltar i tillegg til valutareservane Statens pensjonsfond utland på vegner av Finansdepartementet.
Kva er fordringar på IMF?
Fordringar på det internasjonale valutafondet (IMF) utgjer saman med valutareservane Noregs Banks internasjonale reservar. Fordringane på IMF omfattar i hovudsak tre komponentar: «arbeidskonto» i SDR (Special Drawing Rights), reserveposisjonen og lån til IMF (mellom anna bilaterale lån og lån i samband med «Poverty Reduction and Growth Trust»). Hovudstyret har delegert til sentralbanksjefen å fastsetje retningslinjer for forvaltinga av SDR. Sjå òg Noregs Banks årsmelding og regnskap, kapitla om kapitalforvaltninga og om internasjonalt samarbeid.
Kva er valutaintervensjonar?
Valutaintervensjonar er ein sentralbanks kjøp og sal av utanlandsk valuta mot innanlandsk valuta. Formålet er å påverke valutakursen. Noregs Bank har beredskap for å kunne intervenere i valutamarknaden på kort varsel, men vil normalt ikkje bruke intervensjonar med sikte på å påverke kronekursen.

Utskrift